武俠小說宗師金庸筆下嘅人物位位傳奇，其實佢自己嘅一生同樣不凡。金庸1964年於明報發表社評，同舊東家《大公報》隔空筆戰，足足「開戰」成個月，喺社會引起好大關注。結局係點？由外交部長陳毅等人出面調停，先至收科。

大躍進之後，內地大量難民於1963年逃到香港，當時明報幾乎日日頭版報道件事。去到1964年，內地試爆核彈，金庸認為當時中國人生活困苦，發展核子未係時候，11月尾用「明報編輯部」名義發表社論《寧要褲子，不要核彈》，迎戰「寧要核子，不要褲子」嘅說法。金庸嘅立場引起唔少左派報章圍攻，除咗大公報，文匯報、新晚報等亦加入戰團，掀起報壇風暴。

當時明報每日於頭版頭條發表文章，題目包括《敬請〈大公報〉指教和答覆》等，同埋就「核子與褲子」、收回俄佔地與否、內地是否應向外國輸出糧食等議題，與大公報筆戰，而大公報不甘示弱，以佢反共反華、親英崇美等「還擊」。

後嚟陳毅等人出面，指示大公報「停戰」，而依場筆戰最後以明報嘅《有什麼不對，請原諒！》作結，文入面強調係想講道理，而非人身攻擊。

文革期間，金庸持強烈反對態度，再次被重點攻擊，據講甚至被列入暗殺名單，搞到一度要移居新加坡。隨住改革開放推進，1981年時任全國政協主席鄧小平同金庸見面，令金庸成為鄧小平復出之後首位接見嘅香港人。

「你的小說我讀過」，鄧小平仲話佢哋兩個已經係老朋友。有傳言話，鄧小平响文革結束之後，曾託人幫佢由境外買咗套金庸作品。而有一種講法，話因為同鄧小平見完面，所以金庸嘅武俠小說先响內地解禁，後嚟金庸返咗香港之後，仲寄咗套作品全集過鄧小平添。